سيدة تطلب طلاق للضرر..بسبب “لعب الأطفال”

كتب -أسماء سرور

رفعت السيدة “أسماء .ط” 32سنة على زوجها دعوى خلع بسبب بخله الشديد على أطفالها.

وقفت السيدة أسماء أمام محكمة الأسرة تطلب الطلاق وقالت:” أنا متزوجة من عشر سنين وجوزى مغترب برة مصر،عندى 3 أطفال من ساعة ما أتجوزت وجوزى مدخلش بلعبة واحدة على عياله مع أنه لما بينزل بيكون عامل حساب ولاد أخواته وأصحابه فى الهدايا ولما أتكلمت معاه قال كفاية الفلوس اللى ببعتها ليكم كل شهر أشترى أنتى ليهم او هاتى من مرتبك” .

وأضافت أسماء:”عيالى نفسهم بتتكسر وبيزعلو جامد لما بيبقى نفسهم فى لعبة وهو يرفض ،لحد ما نزل الأجازة اللى فاتت وأبنى الكبير 9 سنين عجبته لعبة خدها ولعب بيها وهو كان جايبها لإبن أخته هو شافه اتجنن ونزل فيه ضرب بهستيريا وقعد يشتم فيا ويزعق ،روحت عشان احمى ابنى ضربنى أنا كمان ضرب مبرح وكل دة بسبب لعبة ،خدت بعضى وروحت لأهلى غضبانة وعملت محضر بالضرب واهله كلمونى واتنازلت عنه وهو مجاش حتى يعتذر وسافر تانى ومن يومها متكلمش معانا من 6 شهور ،لجأت أرفع طلاق للضرر بسبب إستحالة العشرة بينا”.

وقبلت المحكمة الدعوى ولم تصدر حكمها حتى الآن.