من دفتر أحوال المرأة..سيدة تخلع زوجها بسبب “تسلط أمه”

كتب -أسماء سرور

رفعت السيدة “شهد .ع ” 25 سنة على زوجها دعوى خلع بسبب تحكم أمه فى حياتها وسرقة أهله محتويات مطبخها .

وقفت السيدة شهد أمام محكمة الأسرة، وقالت:” أنا متزوجة من سنة جوزى طيب وللأسف شخصيته ضعيفة قدام أمه وأخواته البنات خاصة أنه الوحيد على 3 بنات فكانت حماتى الكلمة كلمتها وبتمشى على الكل “.

وأضافت:” طبعا كانت ملاك فى فترة الخطوبة بس بعد الجواز قالتها صراحة “بناتى وأنا هنا قبلك فى البيت هتسمعى الكلام هتبقى فى الجنة ..هتعصى أوامرى هتشوفى الجحيم ” طبعا أنا شخصيتى قوية قولتلها أزاى تتكلمى معايا كدة انت ليكى شقتك وانا ليا شقتى قالت هنشوف”.

وأكملت:” فعلا كانت بتدخل فى كبيرة وصغيرة وحكمت على جوزى نكشف بعد شهرين جواز عشان الحمل وربنا أراد وكنت حامل حكمت عليه تروح هيا كل الكشوفات معايا وفرحت إنى حامل فى ولد وقالت أوعى تفتكرى أن دة هيغير حاجة كله واحد عندى ،طبعا كانت بتطلع تاخد هدوم ومكياج من عندى هيا وبناتها وكنت بعمل مشاكل وكانت بتعدى”.

واستطردت:”شهد وقالت جه وقت الولادة قالت لازم أولد عندها رفضت وروحت عند أهلى حكمت على جوزى حتى ميجيش يشوف الولد ولا يسجله ،اضطريت أرجع شقتى بعد شهر لاقيت الصدمة حماتى خدت الحلل والأطباق وحاجات المطبخ اتجننت ونزلت أسالها قالت “ملكيش حاجة عندنا روحى اثبتى أن كان فى حاجة فى المطبخ ” طبعا شديت قصادها وبعدين طلعت شقتى لحد ما جوزى يجى ،أول ما دخل قالى روحى بيت أهلك أنا خلاص مش عاوزك طب طلق قال أمى لسه مقلتش أطلقك ولا أسيبك ، اضطريت ألجأ للخلع” .

حكمت المحكمة بالخلع والطلاق طلقة بائنة وإثبات الطفل والنفقات المترتبة على الخلع .